fjott.com

Erfaringsmessig går det sjeldan så bra med nyttårsforsett, men i heimen satsar vi frikst og har framleis store ambisjonar om (og trua på at det skal bli) meir fisk i kvardagen. Og takka vere BTs laurdagsmagasin fekk eg eit framifrå forslag servert på eit fat: Plukkfisk. I min barndom var dette ein av dei få fiskerettane eg fann akseptable. Men plukkfisk er då ikkje ein rett, høyrer eg deg sei. Spør ikkje meg, men ifølge matskribent Midttun er dette ein av yndlingsrettane hans. No til dags kan altså restemiddag vere ein yndlingsrett. Eg er ikkje vanskeleg å be iallfall. Dette er ei litt modda utgåve, sida BT si oppskrift etter mi meining var litt for gniten på potetene bl.a:

• 800 g kvit fisk (eg hadde ein pakke torskefilet i billegutgåve og ein pakke gourmettorsk i frysaren, det dugde)
• 8-9 poteter
• 1 lauk (kepa eller raud)
• 4 sjalottlauk
• Ca 200 g smør (meierismør feks)
• Graslauk
• Mjølk eller fløyte

Skrell poteter, skjer dei gjerne i bitar, og kok dei. Rensk og grovhakk lauken og fres den i panne med nokre klattar smør. Bland dei ferdigkokte potetene med lauken og mos/rør det saman med feks ei tresleiv. Ha i meir smør og spe med litt mjølk eller fløyte. Trekk fisken i ca 10 min og rør den saman med resten. Ha i resten av smør, spe eventuelt med meir mjølk eller fløyte og smak til med salt og pepar. Pynt med finhakka graslauk.

Dette er nok til to personar og det som vert til overs høver fint som middag ein annan dag.

Basert på ei oppskrift frå BTmagasinet laurdag 12.01.08.